Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев эшлекле сәфәр белән Башкортстан Республикасында. Бүген ул легендар дивизия командиры, Русия Герое Миңнегали Шәйморатовның туган авылы Шәйморатка килде.

Эшлекле сәфәр кысаларында кунаклар герой һәйкәленә чәчәкләр салдылар һәм Шәйморатов музее белән таныштылар.

Кырмаскалы районының Шәйморат авылында урнашкан Миңнегали Шәйморатов музее инде берничә дистә еллар дәвамында легендар шәхес, 112 нче Башкорт кавалерия дивизиясе командирының тормышы һәм сугышчан юлы турында истәлек саклый. Генерал Шәйморатовны белгән һәм үз күзләре белән күргән кешеләр елдан-ел кими бара. Ләкин  халык үзенең данлы героен хәтерли һәм алар белән горурлана.