Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев эш сәфәре белән Якутск шәһәренә килде. Биредә ул Саха Республикасында XXV Федераль Сабан туен үткәрү урынын карады.
Милли Шура рәисе “Орто Дойду” комплексында булды. “Орто-Дойду” Хангалас улусының иң масштаблы һәм истәлекле урыннарының берсе. Комплекс тарихи йола җирлеге булып тора, анда ел саен июнь ахырында якутларның төп милли бәйрәме Ысыах үткәрелә. Комплекс зур территорияне били, анда “ураса” борынгы традицион корылмалар, улус тотемы – бөркет сурәтләнгән композиция, күзәтү мәйданчыгы урнашкан.
