Татарстан язучылар берлеге рәисе Ркаил Зәйдулла мәктәп укучылары сәхнәләштерү өчен әзер кыска пьесалар соравын әйтте.
«Мәктәпләрдә очрашу вакытында бездән гел скетчлар сорыйлар. Балалар театрны бик ярата. Төрле чараларда сәхнәләштерер өчен алар заманча әсәрләр эзли. Кыска пьесаларга ихтыяҗ зур. Балалар зур пьесалардан да өзекләр алып уйный, ләкин әдәбият кануннарына туры килгән кыска гына әзер әсәр — скетч булса, яхшырак», — диде Ркаил Зәйдулла.
Яшүсмерләр куллана алырлык кыска пьесаларга игътибарны арттыру максатыннан Роберт Миңнуллин исемендәге балалар һәм яшүсмерләр өчен иң яхшы әдәби әсәрләр бәйгесендә «Иң яхшы скетч» номинациясе булдырылган.
«Татар-информ» мәгълүмат агентлыгында узган матбугат очрашуында бүләкләр фонды 900 мең сум тәшкил иткән яңа әдәби бәйге игълан ителде. Татар телендә балалар һәм яшүсмерләр өчен иҗат ителгән әдәби әсәрләр «Иң яхшы проза әсәре», «Иң яхшы комикс», «Иң яхшы скетч», «Иң яхшы балалар өчен шигырь» номинацияләре буенча кабул ителә.
Бәйгедә катнашу өчен әдәби әсәрләрне 30 ноябрьгә кадәр Татарстан язучылар берлегенә юлларга кирәк.
Рифат Каюмов
