Пенза өлкәсе Кузнецк районы Кече Труев (Дәхтәрни) авылында XVI Бөтенроссия авыл Сабан туеның ачылу тантанасында Татарстан Республикасы Рәисе Рөстәм Миңнеханов барлык кунакларны сәламләде, бәйрәм белән котлады, тынычлык, уңышлар теләде һәм Сабантуйның татарлар өчен генә түгел, бөтен халыклар өчен дә булуын билгеләп үтте. Бүген әлеге бәйрәм Россиянең бөтен халыкларын берләштерә торган мәйдан.

Шулай ук Рөстәм Миңнеханов Пенза өлкәсе губернаторы Олег Владимирович Мельниченкога һәм Пенза халкына  зур рәхмәтләрен җиткерде. “Бүгенге җиңел булмаган шартларда шундый зур масштаблы эшне башкарып чыктыгыз! Зур рәхмәт һәм хөрмәт сезгә!” – диде ул.

Шулай ук Татарстан Рәисе ике төбәк арасындагы дустанә мөнәсәбәтләрне дә билгеләп үтте. Алга таба да шулай дус булып, ярдәм итешеп яшәргә чакырды.

Чыгышы ахырында Татарстан Рәисе Пенза өлкәсенең татар милли-мәдәни мохтариятенә «Газель NEXT» микроавтобусы бүләк итте. Машина ачкычларын мохтариятнең рәисе Винера Мөхәммәтҗанова кабул итеп алды.