16 июльдә Ростов-Дон шәһәрендә Көньяк Сабан туе узды. Бәйрәм уңаеннан биредә яшәүче татарлар чатыр каплавычы өчен тентны милли бизәкле итеп ясаган. Сабантуйда төшерелгән видеофильм әзерләнә. Бу турыда Ростов өлкәсенең «Якташлар» төбәк татар-башкорт оешмасы рәисе Надия Курмакаева хәбәр итте.
«Без оста белән бу идеяне бер ай чамасы якладык. Конструкциянең авырлыгын, дизайнын, 15 00 һәм 16 00 сәгатьләрдә кояш кайсы яктан яктыртуын килеп карадык. Мәйданы 148,84 квадрат метр», – ди Надия Курмакаева әлеге каплавыч турында.
Ростов-Дон шәһәрендә Көньяк Сабан туена татар-мәдәни үзәге бинасын ачарга әзерләнәләр, дип хәбәр иткән идек. Сабан туе вакытында Татар мәдәни үзәге ачылышы уңаеннан Татарстанның Яшел Үзән районы суыткыч бүләк иткән. Суыткычны киләсе дүшәмбе урнаштырырга ниятлиләр.
Сабан туе программасы шартлы рәвештә өч блоктан торды: «Сабантуй – гасырлар буена өзелмәгән җеп» көрәш ярышлары, «Хезмәт файдага. Ә җыр – бүләккә» дигән Татарстан Республикасы һәм Ростов өлкәсе сәнгать осталары концерты, шулай ук халык ярышларының милли төрләре буенча спорт-уен программасы булды.
Сабантуй кунаклары өчен милли иҗат коллективлары чыгышлары, чәкчәк,өчпочмак, шулай ук пылау пешергәннәр. «Өч казанда пылауны иртәнге алтыдан ук пешерә башладылар, хәләл өчпочмаклар һәм пәрәмәчләр белән кунакларны сыйладылар», ди оештыручылар.
Паркка килүчеләр милли уеннарда һәм уеннарда, шулай ук иҗади остаханәләрдә катнашты. Боҗра ыргыту ярышы аеруча популяр булган
Бәйрәмдә 5 меңнән артык кеше, шул исәптән Әрмәнстан, Дагыстан, Белоруссия, Еврей җәмгыяте вәкилләре катнашты. Абсолют батыр исеменә Сочи шәһәреннән 28 яшьлек Тимур Халайджан лаек булган, дип хәбәр иткән идек.
