1-14-нче октябрьдә «Сәләт» сәләтле балалар һәм яшьләр берлеге Татарстан Республикасы Рәссамнар берлеге белән берлектә беренче тапкыр «Шәһри Биләр» республика пленэр-мәктәбен уздыра.
Проектның максаты – табигать гүзәллекләрен һәм сакраль объектларны, мәдәни-тарихи истәлекләрне һәм артефактларны картиналарда мәңгеләштерү; халыкның Шәһри Биләр белән рухи бәйләнешен рәсем аша сурәтләү; профессиональ рәссамнар ярдәмендә Биләрнең бөеклеген күрсәтү һәм иң мөһиме – бу эшкә сәләтле балаларны җәлеп итү.
Пленэр-мәктәп эшчәнлегендә 8-11-нче сыйныфта укучы сәләтле балалар, шулай ук Татарстанда, Русиянең төрле төбәкләрендә сәнгать училищеларында укучылар, югары уку йорты студентлары, чит илләрдә яшәүче милләттәшләребезнең балалары катнаша. Аларны портфолио нигезендә сайлап алдылар.
Пленэр-мәктәп Сәләт Клубы һәм ТР Рәссамнар берлегенең уртак проекты буларак ел дәвамында эшләячәк.
