16-21 июнь көннәрендә Татарстан Язучылар берлеге рәисе Ркаил Зәйдулла Кыргызстанда халыкара Иссык-Күл форумында катнашты һәм хәзерге дөньяда әдәбиятның роле турында чыгыш ясады. Форум кысаларында Казанда «Язучы» нәшриятында басылган «Хәзерге заман кыргыз хикәясе антология»сен тәкъдир итү дә булды.
Мәгълүм булганча, әлеге форум 1986 елда Чыңгыз Айтматов җитәкчелегендә узган иде. Монысы исә Кыргызстан президенты Садыр Җапаровның кереш сүзе белән башланып китте. Әлеге җыенга төрле илләрдән йөздән артык язучылар һәм дәүләт эшлеклеләре чакырылган иде. Арада Кытайдан Нобель премиясе лауреаты (2012) Мо Йәннең чыгышы аеруча кызыксыну уятты.
Чулпан-Ата шәһәрендә Мохтар Әүэзовның музей-йорты ишегалдында аның улы, күренекле әдәбиятчы һәм сәясәтче Морат Әүэзовның һәйкәле ачылды. Анда Казакъстанның һәм Кыргызстанның җәмәгать һәм дәүләт эшлеклеләре, язучылар бар иде. Әлеге тантанада Ркаил Зәйдулла Морат ага турында истәлекләре белән уртаклашты.
Чыганак: sptatar.com
