Кичә Уфада К.Тинчурин пьесасы буенча Фәрит Бикчәнтәев сәхнәләштергән «Сүнгән йолдызлар» спектакле белән Г.Камал исемендәге Татар дәүләт Академия театрының традицион гастрольләре ачылды. Уфа «Нур» татар дәүләт театры залы тулы иде, дип хәбәр итә Камал театры матбугат хезмәте.
Сәхнәдән сәламләү сүзләре белән Г.Камал исемендәге Татар дәүләт Академия театрының баш режиссеры Фәрит Бикчәнтәев, «Нур» театры директоры Фирзат Габидуллин һәм М.Гафури исемендәге Башкорт академия драма театры директоры Иршат Фәйзуллин чыгыш ясады.
Театр Уфага барлыгы 8 спектакль алып килде, алар арасында соңгы еллардагы премьералар һәм легендар «Зәңгәр шәл» дә бар. Гастрольләр 16 ноябрьгә кадәр дәвам итәчәк.
