Иртәгә 15 нче октябрьдә Россия Федерациясендә халык санын алу башлана. Ул бер ай дәвам итә. Әлеге чара җанисәбен алудан тыш, киләчәктә илнең якындагы елларга социаль-икьтисадый үсешен билгеләүне, илкүләм проектларда өстенлекле юнәлешләрне ачыклауны да күздә тота.
Татарстан радиосының иртәнге турыдан-туры эфиры илебез һәм республикабыз тормышы өчен мөһим булган вакыйгага багышланды. Бөтендөнья татар конгрессы башкарма комитеты рәисе Данис Шакиров татар халкы өчен җанисәбен алуның әһәмиятенә тукталды, тыңлаучыларны борчыган четрекле сорауларга җавап бирде, сентябрьдә узган милли җыен йомгаклары белән таныштырды. Студия кунагына без дә берничә сорау белән мөрәҗәгать иттек.
