Ул беренче тапкыр руль артына моннан 73 ел элек сугыштан соң, 13 яшендә утыра. Ул чакта авылдагы ирләрнең байтагы яу кырында ятып кала, кире әйләнеп кайтканнарының да күбесе инвалид-я аяксыз, я кулсыз була. Шуңа күрә бөтен хезмәт хатын-кызлар һәм балалар кулына кала. Сүзебез Чүпрәле районында туып-үскән, бүген Ульяновскида гомер итүче 86 яшьлек Мөстәкыйм ага Мөлеков турында бара. Тугызынчы дистәне ваклаучы хезмәт ветераны әле бүген дә руль артында. Безнең хәбәрчебез Рамис Сафин аның 1972 нче елгы ГАЗ-21 автомобиленә утырып борынгы Сембер урамнарыннан узды.