Бу көннәрдә безнең күршедә генә урнашкан Ульяновск өлкәсендә әстерхан чикләвеге җыюга керештеләр. Әлбәттә инде, зур мәйданнардагы урманнарда түгел, ә һәвәскәр бакчачыларның йорт янындагы җир кишәрлекләрендә һәм дача участокларында. Бер караганда, Ульяновск Казаннан әллә ни ерак та түгел кебек. Әмма ләкин табигый климат шартлары ике төбәктә ике төрле икән. Сембер бакчачыларының абрикос, персик үстерүләре хакында без җәйге тапшыруларыбызның берсендә сөйләгән идек инде. Кайбер шундый бакчаларның берничәсендә безнең бу төбәктәге хәбәрчебез Рамис Сафин да булып кайтты .