Ул кече яшьтән үк рәсем ясау белән шөгылләнә. Мәктәптә укыганда да, армиядә хезмәт иткәндә дә карандаш, буяулар һәм пумала аның кулыннан төшми. Кайда гына эшләсә дә аны стена газетасы чыгаруда җаваплы итеп билгелиләр. Сүзебез 50 нче еллар башында Пермь якларында туып, бүген Ульяновскида гомер итүче рәссам, Татарстаннның атказанган сәнгать эшлеклесе Ирек Нуртдинов турында. Озак еллардан бирле бик күп Бөтенсоюз, Халыкара һәм Бөтенроссия күргәзмәләрендә катнашкан рәссамның Ульяновск шәһәрендә “Прислониха. Ел фасыллары” дип аталган чираттагы шәхси күргәзмәсе ачылды.