Якшәмбе татар мәктәбе укытучысы Алсу Гайнетдинова мәктәпкә йөрүче балаларны татар теленә ничек өйрәтә?
-Бүген якшәмбе мәктәбендә туган телне өйрәнергә йөрүче укучылар белән шәһәребезнең мәчетенә экскурсия оештырдык. Безне Фәрит хәзрәт бик җылы каршы алды. Динебез турында сөйләде, мәчет бүлмәләрен күрсәтеп, алар ни өчен кулланылганын аңлатты. Укучылар үзләре кызыксындырган сорауларга жавап алдылар. Мәчеткә килгән һәркемнең күңелендә бу очрашу изге хисләр уяткандыр. Яңа туган балага исем кушу күренеше балаларга бик кызык кичерешләр калдырды. Бу очрашуларны даими оештырырга дигән теләк белән аерылыштык укучылар белән. Динебезне, телебезне балаларга өйрәтеп, күрсәтеп калдырсак кына милләтебез, телебез яшәр, югалмас, – ди Алсу ханым.
