Иртәгә, 2 ноябрьдә, Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев Чувашия Республикасына сәфәр кыла. Биредә ул туган телләрне һәм халык бердәмлеген саклау темасына түгәрәк өстәл эшендә катнаша. Чара Комсомол районы Тукай авылында узачак.

Эш сәфәре программасы шулай ук Чувашия һәм Татарстан Республикаларының атказанган мәдәният хезмәткәре Фәрит Гыйбатдиновның каберен караудан гыйбарәт. Искәртеп узабыз, милләттәшебез 2020 елның 7 июлендә 61 нче яшендә вафат булды.