2020 елда Татарстан Мәдәният министрлыгы ун документаль, уен һәм анимацион фильм төшерү өчен 7,7 миллион сум күләмендә акчалата ярдәм күрсәтәчәк. Бу хакта ведомствоның матбугат хезмәте хәбәр итә.
«2020 елның икенче кварталында субсидия бирү өчен гаризалар җыю һәм кино төшерүчеләрне билгеләү күздә тотыла», – дип искәрттеләр министрлыкта.
Татарстан геройлары, хәрби-патриотик клублар һәм хәрәкәтләр, хәрби частьләр һәм кораблар, татар халкының Санкт-Петербург шәһәрен төзүгә керткән өлеше, Бөек Ватан сугышында Җиңүнең 75 еллыгына багышланган тулы метражлы документаль фильмнар төшерү өчен 500әр мең сум акча бүлеп биреләчәк.
Татарстанлыларның иҗтимагый тормышына өлеш керткән субкультура вәкилләре турындагы кыска метражлы документаль фильмнар өчен дә 500 мең сум каралган. Республикада яшәүче халыклар арасында татулыкны ныгытуга юнәлдерелгән картина һәм танылган татар эшлеклеләренә багышланган фильмга 350шәр мең сум акча бүленәчәк.
Гомумкешелек кыйммәтләрен пропагандалауга юнәлдерелгән тулы метражлы уен фильмы 2 миллион сумга исәп тота ала.
Авыл тормышын һәм яшьләр арасында хуҗалык итүнең кооператив форматын популярлаштыра торган кыска метражлы уен фильмы һәм әхлаклылык тәрбияләүгә юнәлдерелгән балалар киносына 1әр миллион сум акча каралган.
Бөек Җиңүнең 75 еллыгына багышланган һәм патриотизм тәрбияләүгә юнәлдерелгән анимацион картинага 1 миллион сум юнәлдереләчәк.
