Меңгә якын кунак Себер халыкларының якты традицияләреннән һәм мәдәниятеннән ләззәтләнү өчен Этнографик паркка җыелды. Оештыручылар булып “Ак Калфак” татар милли мәдәнияте үзәге, СО РАН Археология һәм этнография институты, “Позывной “Пилот” иҗтимагый файдалы фонды һәм “Археология PRO” яшьләр берләшмәсе чыгыш ясады.

Программада концертлар, күргәзмәләр, милли уеннар һәм мастер-класслар бар иде. “Пилот” фондының патриотик акциясе аерым игътибарны җәлеп итте: балалар махсус хәрби операциядә катнашучылар өчен ачык хатлар һәм амулетлар ясадылар.

Төп вакыйга милли көрәш ярышы булды. Ярышларның судьясы СССР спорт мастеры Арнольд Топоев иде. Абсолют батыр исеменә Руслан Мөхәммәтҗанов лаек булды, ә юниорлар арасында Карина Хисматуллина җиңде.

Оештыручылар партнерларга һәм спонсорларга зур рәхмәт белдерә.  Бәйрәмне оештыруда Новосибирск өлкәсенең мөселманнары Диния нәзарәте, Full House мебель салоны, Равил Бәдретдинов, Хамзиннар гаиләсе ярдәм иткән.