Бөтендөнья татар конгрессы Милли Шура рәисенең беренче урынбасары – Бөтендөнья татар конгрессы Башкарма комитеты җитәкчесе Данис Фәнис улы Шакиров җитәкчелегендә конгресс делегациясе Кабарда-Балкар Республикасына эш сәфәре белән килде. Сәфәрнең максаты – 20 елдан артык инде монда үткәрелмәгән милли бәйрәмебез – Сабантуйны үткәрүгә бәйле оештыру комитетында катнашу. Бәйрәм 13нче июльдә Нальчик шәһәрендә узачак.
Делегацияне Нальчик шәһәре һава аланында Кабарда-Балкар Республикасы Милләтләр эшләре буенча министр урынбасары Гергоков Джамбулат Борисбиевич һәм Кабарда-Балкар Республикасы “Туган тел” татар милли-мәдәни үзәге иҗтимагый оешмасы рәисе Мананов Исмәил Усман улы каршы алды. Соңрак “Туган тел” җәмгыяте әгъзалары белән очрашу үтте. Иртәгә рәсми очрашулар һәм мәйданчыклар карау планлаштырыла.
