Татарстан Республикасы Мәгариф һәм фән министрлыгының Милли мәгариф идарәсе җитәкчесе Илгиз Халиков I Бөтенроссия “Туган тел” форумы оештырылуны тарихи вакыйга, дип атады. Бу хакта ул форумга багышланган матбугат конференциясендә сөйләде.

– Мондый форумның оештырылуы – тарихи вакыйга. Укытучылар өчен дә шулайдыр, дип уйлыйм. Безнең максат – форумга килгән һәр укытучының үзе өчен файдалы булган мәгълүмат алып китүе. Шуны исәптә тотып, без форумда катнашучылар өчен өстәл китабы ясадык. Бу китапка туган телләрне укыту нигезләренә багышланган материаллар урнаштырылды: федераль стандартларга туры килгән дәреслекләр исемлеге, эш барышында кулланырга мөмкин булган рәсми интернет-ресурслар, ТР Мәгариф һәм фән министрлыгының еллык планы, төрле грантлар хакында мәгълүмат, – диде ул.

Шулай ук форум кысаларында үткәреләчәк дискуссион мәйданчыклар белән дә таныштырды.

1 нче мәйданчык – Татарстан Республикасы муниципаль берәмлекләренең милли мәгариф өчен җаваплы методистлары, белгечләре, мәктәп директорлары өчен булачак. 2 нче мәйданчык – татар теле һәм әдәбияты укытучылары, 3 нче мәйданчык – Россия Федерациясе мәгариф идарәсе органнары вәкилләре, татар милли-мәдәни автономияләре һәм җирле татар иҗтимагый оешмалары вәкилләре, мәгариф идарәсе җитәкчеләре, мәктәп директорлары өчен каралган. 4 нче мәйданчыкка эшендә дини уку йортлары мөгаллимнәре катнаша алачак.

Исегезгә төшерәбез, 2023 елның 12-14 ноябрь көннәрендә Бөтендөнья татар конгрессы Татарстан Республикасы Мәгариф һәм фән министрлыгы белән берлектә Казанда I Бөтенроссия “Туган тел” форумы оештыра. Форумга Россия Федерациясенең 28 төбәгеннән һәм Татарстан Республикасы белем оешмаларыннан 800гә якын татар теле һәм әдәбияты укытучылары һәм мөселман дини укыту оешмалары мөгаллимнәре чакырулы.