VI Бөтендөнья татар хатын-кызлары форумының пленар утырышы эшендә Татарстан Республикасының Халык укытучысы, җәмәгать эшлеклесе Камәрия Хәмидуллина катнашты.
“2021 ел республикада Президентыбыз тарафыннан телләрне саклау елы дип игълан ителде. Бу юкка гына түгел. Татарстан – ана телебезне яклау, саклау өчен, бөтен шартлары да булган Җир шарында бердәнбер мәйдан”, – диде Камәрия Зиннур кызы.
“Тел язмышы, ахыр чиктә, милләт язмышы гаилә институты белән бик бәйле. Бүген туган телен көнкүреш дәрәҗәсендә генә белгән ата-аналар балалар тәрбияли. Мондый чорда ана телен саклау проблемасын гаилә генә хәл итә алмый. Аның моңа көче җитми”, – дип өстәде ул.
Камәрия Хәмидуллина ассызыклаганча, бүгенге көндә мәгарифкә басым ясарга кирәк. Ачык мисал итеп ул туган телдә белем алып, Бердәм дәүләт имтиханын 399 баллга биргән Рамил Баһавиевны атады.
