Кукмара районы Өркеш авылында 27 июльдән һәр елдагыча “Әниләр һәм бәбиләр” җәйләве эшли башлый. Җиденче августка кадәр дәвам итәчәк җәйләүгә әниләрне 5 яшьтән 15 яшькә кадәр балалар белән чакыралар. Җәйләүне Җәләлиевлар гаиләсе Кукмара мөхтәсибәте, Казан шәһәрендәге Гадел мәчете, Ислам дине кабул ителүгә 1000 ел исемендәге мәдрәсә шәкертләре ярдәме белән оештыра.
Программада – Ислам дине нигезләре, зикердә катнашу, бер сүрә ятлау, әдәп-әхлак темасына, Ислам тарихы буенча берәр чыгыш ясау, бер газет чыгару. Иртән буыннарга йога һәм цигун буенча күнегүләр ясау, беренче ярдәм күрсәтү өчен Су-дҗок системасыннан 1-2 адымны истә калдыру каралган. Мастер класс, квест, спорт ярышлары, татарча берәр язучының әсәрен сәхнәләштерү, походка бару, су юлларын чистарту көтелә.
