Башкортстан Республикасы Башлыгы Радий Хәбиров йөкләмәсе буенча быел Башкортстанда республиканың халык шагыйре Рәми Гариповның тууына 90 ел тулуны билгеләп үтәләр. Шул уңайдан Бөтендөнья башкорт корылтае бер шигырь – «Туган тел»не дөнья телләренә тәрҗемә җыентыгын әзерләде. «Башинформ» шул турыда яза.
Бу проектта Россия һәм дөнья төбәкләреннән 54 автор – халык шагыйрьләре, профессиональ әдәбият берлекләре әгъзалары, тәрҗемәчеләр катнашты. Шигырь 45 телгә тәрҗемә ителгән: рус, авар, себер-татар, ногай, украин, итальян, белорус, кумык, цахур, фарсы һәм башка телләр.
Рәми Гарипов үзе 50дән артык авторның шигырьләрен башкорт теленә тәрҗемә иткән.
Проект авторлары — Лариса Абдуллина (Башкортстан Республикасы) һәм Светлана Быкова (Беларусь Республикасы), рәссам — шагыйрьнең улы Азамат Гарипов, дизайнер – Анатолий Корнеев.
