16 февральдә Башкортстанның һәм Татарстанның атказанган артисты, Туймазы татар дәүләт драма театры актрисасы Рима Ключареваның «Көт мине» бенефис спектакле узды. Спектакльнең Режиссер-куючысы – БРның атказанган артисты Фәндил Мөхәммәтдинов, музыкаль бизәүче – Константин Ключарев.
⠀
Тантаналы өлеш вакытында Рима Ключареваны Башкортстан мәдәният министры урынбасары Ринат Гайсин котлады. Ул Башкортстан башлыгы Радий Хәбировның Рәхмәт хатын тапшырды һәм БР мәдәният министры Әминә Шәфикованың котлау телеграммасын укыды.
⠀
Бөтендөнья татар конгрессы Башкарма комитеты җитәкчесе урынбасары, Милли мәгариф, мәдәният һәм спорт комитеты җитәкчесе Разил Зиннәтуллин актрисага мәртәбәле бүләк – “Татар халкы алдындагы зур хезмәтләре өчен” Бөтендөнья татар конгрессы медален тапшырды.
⠀
Чараны талантлы артистлар Резеда Сабитова, БР халык артисты Айрат Солтанов һәм БР атказанган мәдәният хезмәткәре Гаяз Исмәгыйлев башкаруында Рима Шаһит кызы шигырьләренә язылган җырлар бизәде.

Чыганак: БРда БТК вәкиллеге