Татарстанның Язучылар берлеге рәисе Ркаил Зәйдулла «Изге Болгар җыены»нда сәхнәгә чыккан шагыйрьләрне халыкның җылы каршы алуын әйтте.

«Без ел саен киләбез. Бүген, әлбәттә, тарихыбыз, милли, дини темаларга багышланган шигырьләр дә сөйләдек. Күптән түгел Түбән Кама шагыйре Рафыйк Әхмәдиев шалтыратты. «Нишләп анда шагыйрьләр халыкка шигырьләрен укымый?» – ди. Мин программаны төзүчеләр, Мәдәният министрлыгы белән элемтәгә кердем. Безгә төп сәхнәдә чыгыш ясау өчен вакыт бирделәр. Халык бик җылы кабул итте. Киләсе елларда да шигырь укуларны үткәрергә җыенабыз, бәлки, аерым мәйданчыкта ясарбыз», – дип сөйләде ул «Татар-информ» хәбәрчесенә.

Рәис 2011 елны искә алды. Ул елны җыенның сценариен үзе язган булган. Анда да шигырьләр яңгыраган булган.

Чыганак: tatar-inform.tatar