Бүген Бурятия Республикасына эш сәфәре кысаларында Татарстан Республикасы Президенты Р.Н. Миңнеханов Бурятия Республикасы Төбәк татар милли-мәдәни автономиясе әгъзалары белән очрашты.
Түгәрәк өстәл эшендә Бурятия Республикасы Башлыгы А.С. Цыденов та катнашты.
Очрашуның модераторы – Бөтендөнья татар конгрессы Башкарма комитеты җитәкчесе Д.Ф.Шакиров – милләттәшләрне сәламләп, сүзне Бурятия Республикасы Төбәк татар милли-мәдәни автономиясе рәисе С.Р. Баталовага бирде. Биредә ул Бурятия татарларының брендлары һәм социаль инновацияләре турында презентация ясады.
Әңгәмә барышында татарларның милли-мәдәни мирасын татар халык биюләре аша халыкка җиткерү кебек мәсьәлә дә каралды. Бу хакта «Байкал-Идел» бию мәктәбе җитәкчесе Т.Ш. Вәлиева сөйләде.
Рөстәм Нургали улы милләттәшләребезгә татар халкының гореф-гадәтләрен, бигрәк тә татар телен саклап калулары өчен олы рәхмәтен белдерде.
Чара ахырында Бурятия Республикасы Төбәк татар милли-мәдәни автономия әгъзаларын Татарстан Республикасы Президентының Рәхмәт хаты белән бүләкләү тантанасы узды. Татарстан Республикасы Президенты Рөстәм Нургали улы Миңнехановның Рәхмәт сүзе Татар халкының рухи-әхлакый һәм мәдәни традицияләрен саклап калуга һәм үстерүгә өлеш кертүе өчен Бурятия Республикасы Төбәк татар милли-мәдәни автономиясе әгъзасы Р.К. Гариповага, Бурятия Республикасы татарларының Региональ милли-мәдәни автономиясе әгъзасына Ф.Ә. Гәрәевага тапшырылды.
Илүзә Әбелханова
