Бүген Пермь краена эш сәфәре кысаларында Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев Барда авылында Муса Җәлил бюстын урнаштыру урынын карады. Биредә шулай ук шагыйрь исемен йөртәчәк сквер да булдырылачак.

Муса Җәлил (1906-1944) шагыйрь һәм журналист, Бөек Ватан сугышы елларында хәрби корреспондент һәм азатлык өчен көрәшче була. Бу шәхеснең язмышы кыска һәм авыр, ләкин шул ук вакытта бик якты була. Муса Җәлилнең биографиясе, аның иҗаты кебек үк, көрәш, омтылышлар һәм халыкның якты киләчәгенә ышану белән тулы.