Бүген, 4 декабрьдә, Уфа “Нур” татар дәүләт театры 30 еллык юбилеен бәйрәм итә. Тантаналы кичәгә мәртәбәле кунаклар, театрның тугры тамашачылары һәм барлык сәнгать сөючеләр чакырулы. Алар арасында Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев.
Чара башланганчы Милли Шура рәисе театр бинасы каршындагы мәйданда урнаштырылган бөек татар язучысы һәйкәленә чәчәкләр салды. Бу – Габдулла Тукайга Башкортстанда куелган беренче һәйкәл.
Исегезгә төшерәбез, һәйкәл 2019 елның 18 апрелендә Башкортостан Республикасында Татарстан Республикасы көннәре кысаларында ачылды. Тантанада ике республика җитәкчеләре Радий Хәбиров һәм Рөстәм Миңнеханов катнашты.
