Узган гасырда татар әдәбияты Казаннан еракта туып-үскән байтак шагыйрьләр һәм язучылар белән һәрдаим тулыландырылып торган. Мордовия Һади Такташны, Ульяновск Сәхаб Урайскийны, Ренат Харисны, Лерон Хәмидуллины, Чувашия Фәтхи Бурнашны, Пенза төбәге Габдрахман Әпсәләмовларны биргән. Башкортстаннан әле хәзер дә дистәләгән каләм иясе әдәбиятыбызга хезмәт итә. Моннан 60 ел элек Чувашстанның Чичкан авылында туган язучы, шагыйрь, драматург һәм җәмгать эшлеклесе Ркаил Зәйдулла да әлеге зур исемлекне дәвам итүчеләрнең берсе. Шушы көннәрдә генә республиканың Яңа Чабаксар шәһәрендә яшәүчеләр аны үзләренә кунакка чакырып кызыклы гына очрашу оештырдылар.