Актаныш районында татарча көрәш буенча район башлыгы призына багышланган традицион ярышлар узды. Быелгы бәйге аеруча киң колачлы: келәмгә район мәктәпләреннән җыелган 100 яшүсмер егет чыкты. Барлыгы 17 мәктәп командасы көч сынашты.

Әлеге күркәм чарага 1998 елда нигез салынган. Шул вакыттан бирле ул ел саен өзлексез үткәрелеп килә һәм быел инде 27 нче тапкыр уздырыла. Еллар дәвамында әлеге турнир район тормышында мөһим спорт вакыйгасына әверелде, яшьләрне берләштерүче һәм милли традицияләрне саклаучы мәйданга әйләнде.

Татарча көрәш – халкыбызның иң борынгы һәм кадерле спорт төрләренең берсе. Ул егетләрдә көч, җитезлек, чыдамлык кына түгел, ә ихтыяр көче, батырлык һәм ихтирам тәрбияли. Шуңа күрә мондый ярышларның әһәмияте елдан-ел арта бара.

Бәйге барышында яшь көрәшчеләр үзләренең осталыкларын, ныклы әзерлекләрен күрсәттеләр. Һәр очрашу киеренке һәм мавыктыргыч үтте, ә җанатарлар үз командаларын дәртләнеп хуплап торды.

Әлеге турнирның төп максаты – яшь буында сәламәт яшәү рәвешен популярлаштыру, милли спорт төрләренә кызыксыну уяту һәм талантлы көрәшчеләрне ачыклау. Шулай ук ул укучылар арасында дуслыкны ныгыта, аларны уртак максатлар тирәсендә берләштерә.

Актаныш җирендә көрәш традицияләре киләчәктә дә дәвам итәр, ә бүгенге яшь батырлар иртәгәге зур җиңүләргә нигез салыр, дип ышанабыз.

Чыганак: aktanysh-rt.ru