Рабигыль-әүвәл аеның 12нче көнендә, Шәһре Болгарда Мәүлид уңаеннан берничә тантаналы чара уза. Дин кардәшләребезнең бу сөенечен бүлешергә дәрәҗәле кунаклар килде: Татарстан Республикасы Дәүләт Киңәшчесе Минтимер Шәймиев, Татарстан мөфтие Камил хәзрәт Сәмигуллин, Татарстан Республикасы Рәисе Администрациясе Җитәкчесе Әсгать Сәфәров, Ислам мәдәнияте, фәне һәм мәгарифенә ярдәм фондының хәйрия программаларын гамәлгә ашыру буенча киңәшчесе Алексей Петров, Болгар ислам академиясе ректоры Фәрхәт Хөснетдинов, ТР Дәүләт Советы депутаты, “Алексеевскдорстрой” генераль директоры Фоат Вәлиев һ.б.
Программа буенча беренче тантаналы чара – Болгар ислам академиясе студентлары өчен спорт мәйданчыгын ачу тантанасы булды. Универсаль спорт мәйданчыгы – Болгар шәһәрендәге академия территориясендә спорт дәресләре һәм саф һавада уеннар уздыру урыны – Ислам мәдәнияте, фәне һәм мәгарифенә ярдәм фондының финанс ярдәме белән сафка басты. Гомуми мәйданы 765 кв.м. булган территория резина белән түшәлгән һәм волейбол, баскетбол, мини-футбол уеннары, шулай ук воркаут өчен (турникларда, швед стеналарында, мускулларның төрле төркемнәренә тренажерларда күнегүләр ясау, өстәл теннисы уйнау өчен һ. б.) билгеләнгән.
Спорт мәйданчыгы академия шәкертләре һәм хезмәткәрләренең физик культура һәм спорт белән шөгыльләнү ихтыяҗларын максималь дәрәҗәдә канәгатьләндерергә; сәламәт яшәү рәвешен популярлаштыру һәм массакүләм спортка җәлеп итү максатыннан укучыларны һәм хезмәткәрләрне спорт тормышына җәлеп итәргә; яшьләрне физик тәрбияләү өлкәсендә дәүләт сәясәте программаларын гамәлгә ашыруда катнашырга; хезмәт эшчәнлеге алып баручы затларга “Хезмәткә һәм оборонага әзер” (ГТО) Бөтенроссия физкультура-спорт комплексы нормативларына әзерлек һәм тапшыру; сәламәтлекне саклауга һәм ныгытуга юнәлдерелгән спорт чаралары, бәйрәмнәр уздыруны һәм укучыларның һәм хезмәткәрләрнең ялын оештыруны гамәлгә ашырырга мөмкинлек бирә.
Минтимер Шәрипов, чарага җыелучыларны сәламләп, ачылу вакытыннан алып бүгенгә кадәр БИА үсешенә һәм соңгы вакытта күзгә күренеп торган уңай үзгәрешләргә канәгатьләнүен белдерде, аның эшчәнлегенең югары әһәмиятен ассызыклады, Татарстанда һәм Россиядә ислам традицияләрен саклауның һәм татулык мөнәсәбәтләрен саклауның мөһимлеген билгеләп үтте.
Мөфти Камил хәзрәт үз чиратында һәр мөселманның Аллаһы Тәгаләдән әманәт буларак үз сәламәтлеге һәм физик саулыгын кайгыртырга тиеш булуы турында искә төшерде, шулай ук физик яктан көчле мөселманның җәмгыять һәм ислам өчен башкаларга караганда күбрәк файда китерә алуын билгеләп үтте. Ул студентларга академиядә укыган чакта белемнәрен генә түгел, сәламәтлекләрен дә ныгытуларын теләде. Камил хәзрәт аеруча спорт мәйданчыгының Мәүлид көнендә ачылуын искә алды һәм бу мөбәрак айның фазыйләтләре турында сөйләде, сөннәт буенча яшәргә һәм Мәүлидкә шатлануны күрсәтергә чакырды.
Болгар ислам академиясе ректоры Фәрхәт Хөснетдинов спорт мәйданчыгы проектын гамәлгә ашыруда катнашучыларга рәхмәт сүзләрен җиткерде һәм башка инфраструктураны үстерү буенча башкарылган эшләр турында сөйләде.
Рәсми чыгышлардан соң тантана мәйданга керү урынында символик рәвештә тасманы кисү һәм студентлар арасында иптәшләрчә матч белән дәвам итте.
Аннары кунаклар, БИА җитәкчелеге һәм студентлар Минтимер Шәриф улы белән очрашуга юл тотты. Монда ул дини һәм тарихи һәйкәлләрне торгызу темасына лекция белән чыгыш ясады. Студентлар аның белән аралашу һәм сораулар бирә алу мөмкинлегенә ия булды.
Чыганак: dumrt.ru
