Буада яңартылган «Мирас» яшьләр үзәге ачылды. Ремонттан соң анда актлар залы, спорт һәм кибер-заллар, фотостудия,тавыш яздыру студиясе, медиаүзәк, арт-пространство һәм кафе зонасы барлыкка килде. 666,2 кв. м мәйданлы ике катлы бинаны реновацияләүгә республика бюджетыннан 73 млн сумнан артык акча юнәлтелгән. Объектны ачу тантанасында ТР Яшьләр эшләре министры Ринат Садыйков һәм Буа районы башлыгы Ранис Камартдинов катнашты.
«Бүген без күп функцияле заманча яшьләр үзәген күрдек, ул район яшьләре арасында бик кирәкле булыр дип ышанам. Буа районында 10 меңгә якын яшь кеше яши. Бина яшүсмерләр һәм яшьләрнең төрле сорауларына җавап бирә. Без беренче чиратта яшьләр киңлекләрен булдыруда объектив ихтыяҗ белән җитәкчелек итәбез», – дип сөйләде Ринат Садыйков.
Район яшьләре җәйге террасада вакыт үткәрә, медиаүзәктә үз идеяләре турында фикер алыша һәм тудыра, иҗат кичәләре үткәрә һәм ашханә остаханәсендә милли ризыклар әзерли алачак. Анда үз кафесы белән коворкинг барлыкка килде бу яшьләр өчен эш, ял, очрашу һәм аралашу өчен универсаль мәйданчык. Монда яшьләр үзләренең уку, һөнәри, иҗтимагый проектлары өстендә эшли ала.
Спорт залында йога һәм гимнастика белән шөгыльләнү мөмкинлеге бар. Компьютер классы киберспорт белән шөгыльләнү мөмкинлеге булган көчле ноутбуклар белән җиһазландырылган.
Тавыш яздыру студиясе заманча техника һәм инструментлар белән җиһазландырылган, анда музыкаль конкурс башлау планлаштырыла, аның нәтиҗәләре буенча җиңүче шәһәрдә үз җыры белән чыгыш ясаячак.
Буа районына эш сәфәре кысаларында министр район башлыгы белән очрашты, алар район яшьләре өчен яңа инициативалар, бүгенге көндә яшьләрнең төрле категорияләреннән булган сораулар турында фикер алыштылар.
2020 елдан Татарстан Республикасында яшьләр үзәкләренең матди базасын капиталь ремонтлау һәм ныгыту программасы гамәлгә ашырыла, аның кысаларында 1,076 млрд сумлык 16 яшьләр үзәге ремонтланган.
2023 елда 6 муниципаль берәмлекнең 6 яшьләр үзәгендә 453 млн сум күләмендә капиталь ремонт үткәрү кертелгән.
Чыганак: minmol.tatarstan.ru
