Бөтендөнья татар конгрессы Башкарма комитеты җитәкчесе Данис Шакиров Г.Тукай исемендәге Арча педагогия көллиятенең иң актив һәм талантлы студентларына Бөтендөнья татар конгрессының исемле стипендияләрен тапшырды. Стипендияләргә чыгарылыш курс студентлары Ландыш Сәйфуллина, Гөлия Ризванова, Ренал Усманов һәм өченче курс студентлары Илназ Абзалов, Рәзил Шәрифуллин, Әмир Халиуллин, Булат Ситтиков лаек булдылар.

Исегезгә төшерәбез, 2014нче елдан башлап, һәр ел саен Арча педагогия көллиятенең талантлы, укуда, класстан тыш чараларда, спортта зур уңышларга ирешкән, район, шәһәр, республика һәм бөтенроссия конкурсларында катнашкан, татар телен һәм әдәбиятын, милли мәдәниятебезне яхшы белгән зыялы студентларына Бөтендөнья татар конгрессы Башкарма комитеты тарафыннан махсус стипендия бирелеп килә.