Лениногорск Мәдәният сарае сәхнәсендә Р.Шиһап исемендәге халык театры Мөнирә Сафина әсәре буенча “Өзелгән өмет” спектаклен сәхнәләштерде.

Лениногорскилыларга спектакль аша төрле буынның язмышларын, аларның бер-берсенә мөнәсәбәтләрен күрсәттеләр. Әби һәм бабай ролен башкаручы артистлар (Мәдинә Сафиуллина һәм Рәфис Сөләйманов) шулхәтле тормышчан итеп уйнадылар, әйтерсең лә, вакыйгалар чынбарлык тормышта бара.

Еллар узу белән балаларның олыгайган ата-аналары хакында онытулары – күңелләргә үтеп керде, кызгану хисе тудырды.

Спектакль аша артистлар шәфкатьлелек, мәрхәмәтлелек, кызгану, өлкән буынга игътибар кебек сыйфатларның – иң кыйммәтлесе икәнен тамашачыга җиткерергә тырыштылар.

Спектакль тәмамлангач, тамашачы артисларны аягүрә басып алкышлады. Театр коллективын премьера белән Мәдәният сарае директоры Флера Төхвәтова котлады. Уңышлар теләде.

Рольләрне башкардылар: Мәдинә Сафиуллина, Флера Тәхауова, Рәфис Сөләйманов, Мөгаллимә Сәмигуллина, Гүзәл Курмашова.

Чыганак: zamansulyshy.ru