Татарстанда Туган телләр һәм халыклар бердәмлеге елы игълан ителү уңаеннан республика мәчетләрендә татарлар арасында дини-милли үзаң, туган телгә мәхәббәт тәрбияләү, татар-мөселман традицияләрен саклауга юнәлтелгән чаралар актив уздырыла. Агымдагы елның 2 ае эчендә мөхтәсибәтләрдә 210 чара оештырылды.
Алар арасында татар телен белүгә багышланган викториналар, балалар бәйрәмнәре, азан әйтү һәм Коръән уку буенча чаралар, бәйгеләр, вәгазь кичәләре, “Милләтеңне сакла” дип исемләнгән мавыктыргыч күңел ачу программасы, “Туган телем – сайрар кошым” дип аталган плакатлар бәйгесе, шәмаилләр күргәзмәсе, “Туган телем – сайрар кошым” дип аталган плакатлар бәйгесе, “Туган телем – иркә гөлем” дип исемләнгән брейн-ринг, сәламәтлеккә туймаган балалар арасында татар телендә шигырь укучылар һәм җырлар башкаручыларның «Без булдырабыз» дип аталган дистанцион бәйгесе, “Васыятьнамә – киләсе буыннарга әйтер сүз” бәйгесе, татар дин галимнәре мирасын өйрәнүгә багышланган җыеннар һ.б. бар. Якындагы киләчәктә мөхтсәбәтләрдә татар көрәше турниры, Татарстан мәдрәсәләре һәм ислам югары уку йортлары шәкертләре арасында татар теле, әдәбияты һәм татар халкы тарихы буенча республикакүләм олимпиада, шигырь бәйрәмнәре үткәреләчәк.
Белешмә.
Исегезгә төшерәбез, Татарстан мөфтие Камил хәзрәт Сәмигуллин карары нигезендә татар телен һәм татар милли үзенчәлекләрне саклап калу ТР МДН эшчәнлегенең өстенлекле юнәлешләренең берсе булып тора. Мөфтият, аның гамәлгә куйган оешмалары, мәчетләре һәм уку йортларының эше татар телендә алып барыла, шул исәптән республика чикләрендәге эш кәгазьләре һәм эшлекле багланышлары да. Моннан тыш, ТР МДН республика мәчетләрендә татар телле мохит булдыру һәм саклау буенча берничә башлангыч алып бара. Мисал өчен, мәчетләрнең мәйданчыклары татар теле курсларын, дини, иҗтимагый, яшьләр һәм балалар өчен махсус татар телле чараларны, халыкка татар телендә хезмәт күрсәтү һәм консультацияләр бирүне, туган телгә мәхәббәт тәрбияләүче вәгазьләр укуны оештыру өчен файдаланыла. Шул ук вакытта республикадагы мәдрәсәнең 5сендә укыту татар телендә, 3сендә ике телдә алып барыла – бу чит төбәкләрне татар телле һәм милли үзаңлы имамнар белән тәэмин итәргә мөмкинлек бирә. Шунысы да әһәмиятле, ТР МДН-да аттестация узган рәсми имамнар өчен таләпләрнең берсе булып татар телен вәгазьләр уку һәм эш хатлары язу дәрәҗәсендә белү тора. Нәзарәтнең аеруча актуаль тәҗрибәсе татар мәктәпләрен гамәлгә кую белән бәйле: бүгенге көндә Әлмәт мөхтәсибәтендә “Нур” мәктәбе эшләп килә, сентябрь аенда Алабуга мөхтәсибәтендә “Ихсан” мәктәбе ачылуы көтелә. Яңа сезонда мөфтият республиканың 100 мәчетендә татар теле курсларын оештырырга ниятли. Аның методикасы РИИ-да эшләнә, дәреслеге нәзарәтнең “Хозур” нәшриятында бастырыла. Шулай ук Нәзарәт татар телендә киң нәшрият эшчәнлеген һәм күпләгән медиапроектларны тормышка ашыра.
