Бүген, 17 сентябрь, Үзбәкстан Республикасы Ташкент шәһәрендә Халыкара “Татар кызы”  бәйгесенең финал ярышлары үтте.

Бәйгенең җиңүчесе – Пенза өлкәсеннән Альбина Медведева. Альбина 11 яшькә кадәр бию белән шөгыльләнгән, әдәбият һәм психология белән кызыксына, татар халык ашларын пешерергә ярата, буш вакытларында модель, стилист-визажист булып эшли.

Җиңүчегә машина ачкычларын Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев тапшырды.

Шулай ук Бөтендөнья татар конгрессы Башкарма комитеты җитәкчесе Данис Шакиров төрле номинациядә җиңүчеләрне бүләкләде:

“Иң ягымлы кыз” – Гайнетдинова Аделина;
“Иң зур ачыш” – МөрәхмәДова Диана;
“Иң зыялы кыз” – Котдусова Айгөл;
“Иң уңган кыз” – Гомәрова Зәринә;
“Иң ихлас кыз” – Җамалетдинова Эльназ;
“Иң зирәк кыз”- Миңһаҗева Назлыгөл;
“Иң максатчан кыз” – Абдуллина Динә;
“Иң ялкынлы кыз”- Хатыбҗанова Илсинә;
“Иң моңлы кыз” – Идрисова Алсу;
“Иң тырыш кыз” – Фагаманова Әлфия;
“Иң иҗади кыз” – Байбәкова Камилә;
“Иң назлы кыз” – Палютина Галия;
“Иң нәзакәтле кыз”- Медведева Альбина.

“Татар кызы” бәйгесе – матурлык, сәләт һәм милли традицияләр бәйрәме. Татар кызларының күркәм сыйфатларын, халкыбызның гореф-гадәтләрен, телен, мәдәниятен саклау һәм үстерү, сәләтен күрсәтү — бәйгенең төп максаты булып тора.