Бүген Бөтендөнья татар конгрессының Башкарма комитеты җитәкчесе Данис Шакиров җитәкчелегендәге Татарстан делегациясе Новокузнецк шәһәренә килеп җитте. Кунакларны милләттәшләребез чәкчәк белән каршы алды.
26 июньдә Новокузнецк шәһәрендә II Халыкара шахтерлар Сабан туе узачак. Анда үз гомерен күмер чыгаруга багышлаган татар шахтерлары катнаша. Шулай ук Россия төбәкләреннән, Казахстан, Кыргызстан, Луганск Халык Республикасы һ.б. җирләрдән дә әлеге һөнәр ияләре җыелачак.
Сабантуй программасы күпъкырлы: биредә Татарстан һәм Кемерово өлкәсенең сәнгать осталары катнашында концерт, балалар Сабан туе, көрәш, төрле милли уеннар оештыру күздә тотыла.
Милли бәйрәмебездә Татарстан Президенты Рөстәм Миңнехановның, Кузбасс губернаторы Сергей Цивилевның катнашуы көтелә.
