Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев эш сәфәре белән Казахстан Республикасында. Биредә ул Бейбитшилик утравында урнашкан “Этно-авыл” милли мәдәни комплексында булды.

Милли мәдәни комплекс кунакларны казак халкының бай тарихы, мәдәнияте, сәнгате һәм традицияләре белән таныштыра.Этно-авылда музыка һәм театр сәнгате фестивальләре, декоратив-гамәли сәнгать мастер-класслары, һөнәрчелек һәм сәнгать күргәзмәләре, этник музыка фестивальләре, ат спорты чаралары, милли спорт төрләре буенча ярышлар һәм башка чаралар уза.

Комплекс җитәкчеләре этно-авыл территориясен үстерү буенча киләчәккә планнары турында сөйләделәр. Биредә татар, рус, белорус, немец, корея һ.б. халыклар мәдәнияте чагылдырылачак юрталар төзү планлаштырыла. Милли йортлар үзәк һәм күргәзмә юртасы тирәсендә урнашачак.