2021 елның 3 декабрендә Татарстан Республикасы Премьер-министры урынбасары, Бөтендөнья татар конгрессының Милли Шура рәисе В.Г. Шәйхразыев Башкортстан Республикасына бара. Күрше регионга сәфәрнең төп максаты – Уфа “Нур” татар дәүләт театрының 30 еллыгына багышланган тантаналы кичәдә катнашу.

Ике көнлек визит үз эченә “Кем син? Мин – татар!” проектына нәтиҗәләр ясауны да ала. Чара 3 декабрьдә узачак. Икенче көнне, 4 декабрьдә, Милли Шура рәисе Стәрлетамак районына юл тотачак. Биредә берничә уку йортлары эшчәнлеге белән танышу планлаштырылган. Кичен кунаклар Уфа “Нур” татар дәүләт театрының 30 еллык юбилеен бәйрәм итәчәк.