Татарстан өчен зур ифтар булды. Җомга көн кич белән мөселманнар, кунаклар – җәмгысы 12 мең кеше “Казан-Экспо” күргәзмәләр үзәгендә җыелды.

Республика ифтарының – үз йөзе, үз тарихы бар. Татарстанда зурлап авыз ачу традициясе әле 2011нче елда барлыкка килде. Быел Республика халкы гына түгел, ислам динен тоткан башка ил вәкилләре дә кушылды. Бу юлы махсус хәрби операциядә катнашучы ир-егетләрнең гаиләләре чакырулы иде. Мәдәни программаны исә Гаилә елына багышладылар.