Ульяновск шәһәренең Иделарьягы районындагы Ислам мәдәният    үзәгендә «Ак калфак» оешмасы татар хатын-кызлары милли кием элементларын эшләү буенча остаханә уздырды.  Анда өлкән апалар-кул осталары балаларны калфак, изү, күкрәкчә тегү, чигү серләре белән таныштырдылар. Остаханәдә күрше авыл районнарыннан килгән кул осталары да үз осталыкларын күрсәтте. Татарстанның Кама Тамагында туып үскән бүген Ульяновскида яшәүче Надирә Хәбибуллина мулинә җебе белән чигеп ясаган рәсемнәре белән күпләрне сокландырды. Чардаклыдан килгән Розалия Горбунова балаларга изү тегү, аны бизәкләп чигү эше белән таныштырды.